Хӗрлӗ Чутай округӗнчи Кивӗ Ирчемес ялӗнче пурӑнакан Елизавета Белова 99 ҫул тултарнӑ.
Вӑрҫӑ ҫулӗсенче вӑл ыттисемпе тан ӗҫленӗ, Ҫӗнтерӗве тылра ҫывхартма пулӑшнӑ. Вӑрҫӑ пӗтсен ҫемье ҫавӑрнӑ. Елизавета Николаевна мӑшӑрӗпе виҫӗ ачана пурнӑҫ парнелесе ура ҫине тӑратнӑ. Вӗсем икӗ хӗрпе пӗр ывӑл ӳстернӗ.
Кинемей – ялта хисеплӗ ҫын. Вӑл яланах ҫынсене пулӑшма тӑрӑшнӑ, нихӑҫан та никама та ӑмсанман. Вӑл халӗ те ырӑ туни каялла ырӑпах таврӑннине ӗненсе пурӑнать.
Кинемее 99 ҫулпа юрласа-ташласа саламланӑ.
Шыв ҫинче каллех инкек пулнӑ. Хӗрлӗ Чутай округӗнче 44 ҫулти арҫын путса вилнӗ.
Ӗнер, утӑ уйӑхӗн 26-мӗшӗнче, каҫхине пӗве хӗрринче Атнар ялӗнче пурӑнакан 44 ҫулти арҫыннӑн япалисене курнӑ. Паян вара водолаз-ҫӑлавҫӑсем пӗвере шыранӑ та унӑн виллине тупнӑ, ҫыран хӗррине илсе тухнӑ.
Палӑртмалла: ҫав вырӑна шыва кӗме ятарласа хатӗрлемен. Эппин, унта шыва кӗме юрамасть. Малтанлӑха палӑртнӑ тӑрӑх, арҫын ӳсӗр пулнӑ.
Сӑмах май, кӑҫал ҫулла пуҫланнӑранпа 8 ҫын путса вилнӗ, вӗсенчен 4-шӗ -ачасем. Пӗр ҫынна ҫӑлма май килнӗ.
Хӗрлӗ Чутай округӗнче пурӑнакан Яндайкинсем ҫемье ҫавӑрнӑранпа 55 ҫул ҫитнине паллӑ тунӑ.
Галина Васильевнӑпа Алексей Ивановичӑн юрату историйӗ интереслӗ: вӗсем пӗр-пӗрне пӗрремӗш хут автобусра курнӑ та туслашнӑ. Ун чухне каччӑ хӗре вырӑн панӑ. Нумай та вӑхӑт иртмен – икӗ уйӑхран вӗсем туй туса пӗрлешнӗ.
Яндайкинсем тивӗҫлӗ канӑва тухиччен Шупашкар хулинче ӗҫлесе пурӑннӑ. Галина Васильевна ҫӗвӗ фабрикинче, ҫар савутӗнче вӑй хунӑ. Алексей Иванович кун-ҫулне чукун ҫулпа ҫыхӑнтарнӑ. Вӑл хулари предприятире стропальщикре тата крановщикре вӑй хунӑ.
«Юратса пӗрлешнӗ пулсан пӗр-пӗрне пурнӑҫ тӑршшӗпе юратмалла, яланах килӗшӳре пурӑнмалла», – тет мӑшӑр. Ҫак сӑмахсене тӗпе хурса пурӑнаҫҫӗ Яндайкинсем. Ҫамрӑксене те ҫакнах сунаҫҫӗ.
Хӗрлӗ Чутай округӗнчи хӗрарӑм хӑйӗн ачисене хӗнесе пурӑннӑ тесе шутлаҫҫӗ. Ун тӗлӗшпе пуҫиле ӗҫ пуҫарнӑ.
Тӗрӗслев ҫакна палӑртнӑ: вӑл 2024 ҫулхи пуш-ака уйӑхӗсенче тата чӳк уйӑхӗнче 2009 ҫулта тата 2025 ҫулта ҫуралнӑ хӗрӗсене хӗненӗ.
Тӗслӗхрен, пуш уйӑхӗн пуҫламӑшӗнче хӗрарӑм хӗрне ӗнсерен ҫапнӑ, унтан пуҫӗпе компьютер сӗтелӗ ҫине кӗрслеттернӗ. Кун хыҫҫӑн ачан сӑмсинчен юн кайнӑ. Кунсӑр пуҫне вӑл ун пуҫӗнчен фарфор турилккене ҫапса ҫӗмӗрнӗ. Тӗрӗслев вӑхӑтӗнче ытти факта та тупса палӑртнӑ.
Халӗ следстви пырать. Ӗҫе район прокуратури сӑнаса тӑрать.
Хӗрлӗ Чутай округӗнче малашне ҫӗнӗ прокурор ӗҫлӗ. Ку вырӑна Раҫҫей Тӗп прокурорӗн хушӑвӗпе килӗшӳллӗн юстицин кӗҫӗн канашҫи Артур Белов йышӑннӑ.
Артур Белов 1989 ҫулта Шупашкарта ҫуралнӑ. Раҫҫей патшалӑх социаллӑ университечӗн филиалӗнчен вӗренсе тухсан вӑл 2013 ҫултанпа Чӑваш Ен прокуратуринче аслӑ специалистра ӗҫленӗ. 2017-2021 ҫулсенче Чӑваш транспорт прокурорӗн пулӑшуҫи тата аслӑ пулӑшуҫи пулнӑ. 2021 ҫултанпа Шупашкарти Калинин районӗн прокуратуринче, республика прокуратуринче тата Тӑвай районӗн прокуратуринче тӗрлӗ должноҫре ӗҫленӗ. 2024 ҫултанпа вара Улатӑрти районсен хушшинчи прокурорӑн ҫумӗ пулнӑ.
Чӑваш Ен прокурорӗ Эдуард Гиматов Хӗрлӗ Чутай районӗн прокуратурин коллективне ҫӗнӗ прокурорпа паллаштарнӑ.
| ҪӖР | 11 |
Хӗрлӗ Чутай районӗнчи Горбатовка ялне газ илсе ҫитермен иккен. Ку ыйтупа ял старости Ольга Ипатова республика Элтеперӗ Олег Николаев патне ҫул тытнӑ. Республика ертӳҫине хӑюллӑ хӗрарӑм газификаци ӗҫне хӑвӑртлатма ыйтнӑ.
Олег Николаев ӗнентернӗ тӑрӑх, ку яла 2025-2026 ҫулсенче газ кӗртмелли республикӑри программӑна кӗртсе хӑварнӑ.
Кӑҫал пирӗн республикӑра пысӑк тата пӗчӗк пусӑмлӑ газ пӑрӑхӗсем хума палӑртса хӑварнӑ, унсӑр пуҫне газ парассине йӗркелесе тӑракан пункт та тӑвасшӑн. Ӗҫе кӑҫалхи тӑваттӑмӗш кварталта вӗҫлемелле.
Элтепер патне ҫитнӗ-ҫитнех, староста вырӑнти масар патне ҫул сарас ыйтӑва та хускатнӑ. Кун пирки Элтепер татсах каламан, анчах муниципалитет пуҫлӑхӗпе ыйтӑва сӳтсе явма шантарнӑ.
Социаллӑ сферӑра ӗҫлекенсем паян професси уявне паллӑ тӑваҫҫӗ. Ку отрасльте чун ӑшшине ыттисемшӗн шеллемен ҫынсем сахал мар. Вӗсенчен пӗри — Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрти Александра Смирнова.
Александра Львовна паян пай заведующийӗнче тӑрӑшать. Анчах ку должноҫе хӑйне шанса париччен вӑл социаллӑ ӗҫчен пулса та, ахаль специалистра та тӑрӑшнӑ. Социаллӑ сферӑна Хӗрлӗ Чутай хӗрӗ амӑшне кура суйланӑ. Вӑл вырӑнти ваттисен ҫурчӗн заведующийӗнче ӗҫленӗ.
Паян Александра Львовна ӗҫре ӗлкӗрсе пынипе пӗрлех лайӑх машӑр та, амӑшӗ те, кин те. Вӑл упӑшкипе виҫӗ хӗр ӳстерет. Александра Львовна ачисемпе тата хунямӑшӗпе пӗрле тӗрлӗ конкурса та хастар хутшӑнать.
Хӗрлӗ Чутай округӗнче питбайкер кювета чӑмса вилнӗ. Ку инкек ҫу уйӑхӗн 27-мӗшӗнче 23 сехет ҫурӑра «Сӑр» автоҫулӑн 51-мӗш ҫухрӑмӗнче пулнӑ.
Малтанлӑха палӑртнӑ тӑрӑх, 1991 ҫулта ҫуралнӑ арҫын «Мотоленд Эндуро» питбайкпа пынӑ. Анчах руле итлеттереймен – кювета чӑмнӑ. Унта шыв тӑнӑ.
Питбайкер ҫавӑнтах вилнӗ. Ҫакӑ паллӑ: вӑл округра пурӑнакан ҫын, унӑн водитель прави те, мотошлем та пулман.
Халӗ ку тӗслӗх тӗлӗшпе тӗрӗслев иртет.
Ҫак хитре сӑнӳкерчӗкре — Хӗрлӗ Чутай округӗнчи Калкассинчи чарӑну. Ку илеме Станислав Маков ӳнерҫӗ тунӑ. Вӑл ҫак ялта пурӑнать.
Ҫынсем ыйтнипе Станислав Маков чарӑнӑва ӳкерсе хитрелетнӗ. Ку чарӑнуран шкул ачисем автобуспа вӗренме ларса каяҫҫӗ. Ҫавӑнпа Станислав Маков ӳкерчӗксене шкул темипе ҫыхӑнтарнӑ. Унтах «Учись! Мечтай! Твори!» тесе ҫырнӑ.
Шкул ачисем питӗ кӑмӑллӑ. Халӗ автобус кӗтсе тӑма та кӑмӑллӑ.
Хӗрлӗ Чутайӗнчи тӗп пульницӑра Константин Будков ҫамрӑк тухтӑр тӑрӑшать. Вӑл Чӑваш патшалӑх университетӗнчен 2025 ҫулта вӗренсе тухнӑранпа тухтӑр пулса тимлет.
МАХри «Хыпар-Вести Чувашии» каналта пӗлтернӗ тӑрӑх, Костя Шупашкарта ҫуралнӑ, ачалӑхӗ Сургут тӑрӑхӗнче иртнӗ. Вӑл 15 ҫулта чухне Будковсем тӑван тӑрӑха таврӑннӑ.
Ҫамрӑк тухтӑр спорт туризмӗпе кӑсӑкланать. Виҫӗ ҫулта каччӑ чылай ҫӗрте пулса курнӑ, вун-вун километра хыҫа хӑварнӑ.
Тухтӑр пулма вӑл ачаранпах ӗмӗтленнӗ май шапасемпе нӑрӑсене сиплеме юратнӑ. Чӑнласа мар-ха. Вылямалла.
Шкулта хими юратса вӗреннӗскер шкул пӗтерсен И.Н. Ульянов ячӗллӗ ЧПУ-ри медицина факультетне вӗренме кӗнӗ. Унтан вӗренсе тухсан вӑл Хӗрлӗ Чутайӗнчи тӗп пульницӑра ӗҫлеме тытӑннӑ. Ӑна унта пурӑнмалли вырӑнпа та тивӗҫтернӗ.
+16.3 °C